Informaziuns vischnaunca
Catalog da multas disciplinaras dalla vischnaunca Laax
La vischnaunca ha surluvrau il catalog da multas disciplinaras. Naven d’immediat vegnan las multas disciplinaras emessas digitalmein e directamein entras la polizia cantunala GR. Cun quella adattaziun vegn la liquidaziun dallas multas disciplinaras simplificada.
Grazia fetg per prender enconuschientscha.
Suprastonza communala
21.10.2026
Restricziun dallas uras d’avertura dil spurtegl uffeci da taglia
Muort lavurs da reconstrucziun ei il spurtegl digl uffeci da taglia aviarts ad interim mo a moda restrenschida.
Il spurtegl ei aviarts mintgamai la gievgia ed il venderdis dallas suandontas uras:
• avonmiezdi: 09:30–11:30
• suentermiezdi: 15:00–17:00
Tier damondas urgentas contonschis Vus nus per telefon 081 921 51 13 ni per e-mail a steueramt@laax-gr.ch.
Uffeci da taglia
16.10.2026
Obligaziun da far pumpiers 2027
Tenor lescha da pumpiers dalla vischnaunca da Laax ein per regla umens e dunnas cun domicil ella vischnaunca da Laax obligai da far pumpiers.
Dils habitonts che vivan en ina lètg buca separada ei sulettamein in dils partenaris obligaus da far pumpiers. En quei cass sedrezza il cuoz dall’obligaziun da far pumpiers tenor la vegliadetgna dil conjugal che gudogna il pli bia.
Tenor las disposiziuns executivas tier la lescha da pumpiers dalla vischnaunca da Laax entscheiva l’obligaziun da dar pumpiers egl onn, el qual il 20avel onn da naschientscha vegn cumplenius. L’obligaziun da far pumpiers finescha alla fin digl onn (31-12), el qual il 42avel onn da naschientscha vegn cumplenius.
La taxa da basa per la taxa da cumpensaziun munta per obligai da far pumpiers cun domicil en la vischnaunca CHF 350.—/onn. Tier domicil jamnil cun domicil en vischnaunca munta la taxa da basa per la taxa da cumpensaziun CHF 100.—/onn. Tier arrivada ni partenza duront igl onn calendar vegn la taxa incassada pro rata tenor il cuoz dil domicil. Per dimorants duront l’jamna succeda l’incassament medemamein proporziunalmein tenor il cuoz dalla dimora.
Persunas che prestan gia survetsch e lessan pagar niev la taxa da cumpensaziun enstagl da prestar survetsch activ duein s’annunziar a scret entochen ils 15 da november 2026 tiel cumandant da pumpiers.
Persunas ch’ein obligadas da far pumpiers e che lessan prestar survetsch san emplenir ora il formular d’annunzia online silla pagina d’interent dalla vischnaunca Laax. www.laax-gr.ch/pumpiers (annunzia pil survetsch da far pumpiers).
Per ulteriuras informaziuns stat il cumandant da pumpiers, Gabriel Walser bugen a disposiziun. feuerwehr@laax-gr.ch
Ils 6 da november 2026 allas 20.00 ha liug la sera d’informaziun el depot da pumpiers Laax. Leu vegn informau sur dallas incumbensas dils pumpiers. Vegni seprasvi!
cumandant da pumpiers
15.10.2026
Messadi ed informaziuns davart il provediment da sanadad ella regiun
Stimadas habitontas e preziai habitonts
Ils 29 da november 2026 voteschan las habitontas ed ils habitonts dallas vischnauncas-commembras dalla corporaziun SanaSurselva davart ina cunvegna da prestaziun nova culla societad Reit da sanadad Surselva SA (RDSS). La vischnaunca da Laax ei buca participada a quella votaziun. Cun quest messadi presenta la suprastonza communala a moda transparenta ils motivs da noss’absenza, per tgei ch’ei va, e co ei va insumma vinavon en quella caussa.
Suprastonza communala
19.06.2026
Rapport da gestiun Flem Laax Falera Management SA 2025/26
Link tier la pagina da web: fatschentas – Flem Laax Falera Management SA
19.06.2026
Tractament e cumbat encunter neofitas
La vischnaunca da Laax fa attens che sin possess privat sederasan adina pli savens neofitas – plontas invasivas che vegnan ord auters loghens. Quellas plontas e fluras fan donn alla vegetaziun indigena, damai che quellas semultiplicheschan fetg spert sin grondas surfatschas e mettan aschia en prighel la biodiversitad.
Unlteriuras informaziuns tier neofitas invasivas:
Info Flora
Amt für Natur und Umwelt Graubünden
Neophyten Schweiz | Invasive Neophyten: Verbotene Pflanzen
Invasive Neophyten
Nus supplichein d’intercurrir Vies terren regularmein sin neofitas e da dismetter las plontinas tenor directivas. Cun Vies agid activ gideis vus da proteger nossa natira indigena.
Engraziel fetg pil sustegn.