giuven · plein slontsch · romontsch

ROMONTSCH Sprache umschalten DEUTSCH
Tgei encuris Vus?
Tgei vul dir
«  »
Laax?
II pli vegl sigil ed ils pli vegls documents tradeschan aunc la vera derivonza dil num dalla vischnaunca: Lags. La fuorma «Lax» cumpara pér sin in sigil duvraus suenter 1424 e la fuorrma «Laax» schizun pér el 16avel tschentaner. Il lag vegn numnaus per l‘emprerma ga en in document 1434 cura ch‘ils Libers da Laax regalan agl uestg da Cuera il lag sul vitg. El Lag Grond anfl‘ins era il glischun, igl animal da uoppen dalla vischnaunca da Laax.
Caltgera?
Liug nua ch’ins barschava caltschina.
Casti?
Denominaziun per il crest cun la ruina Cuolm Liung.
Fraissen?
Scadin da Laax enconuscha il Crap Fraissen che las strias han vuliu ruclar el lag per neghentar gl‘entir vitg. Il tuccar da dis ha denton spuentau las strias e spindrau la vischnaunca.
Grava?
Paliu.
Lag digI Oberst?
Lag e paliu sut il vitg. Tenor la tradiziun duei in colonel da Laax en survetschs jasters, Cristoffel Giuachin Anton de Montalta, haver contrahau culs Franzos a Staderas. EIs hagien sinquei schanegiau il vitg.
Marcau?
El temps medieval haveva liug leu pil di da s. Gag, (16 d‘october) in marcau che cuzzava treis dis.
Murschetg?
El temps medieval in uclaun habitau. In num da famiglia Murtschickh ei documentaus a Sagogn dapi il 16avel tschentaner. II tratsch da Murschetg ei denton ordvart schetgs e carpus, aschia ch‘igl ei era buca sclaus che Murschetg fuva oriundamein il «munt" (cuolm) schetg.
Pardanal?
El 17avel tschentaner ei il num documentaus sco «Madernal sura». Aschia eis ei da supponer ch‘el sereferescha al latin «maternalis» (dalla mumma), forsa pia «bein che deriva ord l’ierta materna».
Platta Pussenta?
Grep, platta al cunfin denter Laax, Falera, Sagogn e Schluein. Documentaus 1526 sco «Platta Cunsennas», pia «grep cun enzennas». Pli tard midaus en «Platta Pussenta» dil sursilvan «pussent» (da vertit e forza particulara). Entuorn ina crusch profundamein engravada en quella platta ein las inizialas da quels loghens medievals nudai cun colur cotschna.
Staderas?
II tierm regorda ch‘ins pesava cheu el temps medieval la rauba da dazi.
Tuleu?
Treis uauls da tieu en vischinonza dil vitg.
Vorab?
Tudestg-svizzer «vorab(a)», «voranaba», pia num daus neu da Glaruna.
Zuneu?
Probabel dil sursilvan «izun» + finiziun -iu/-eu, pia «liug cun bia izuns».

Cordial beinvegni tier nus a Laax

Preziada visitadra e preziau visitader da nossa homepage

Igl ei per mei in grond plascher ed ina honur, che Vus s’interesseis per nies vitg entras visitar nossa homepage. Jeu sperel che Vossa viseta sin nossa pagina porti bia informaziuns sur da nies vitg da habitar ni da vacanzas.

La vischnaunca da Laax ha fatg in svilup rasant, jeu astgel bein dir remarcabel. Aunc all'entschatta dils onns sissonta era Laax in vitg muntagnard idillic e pauper cun 300 habitontas e habitonts. Oz ha Laax ina populaziun da quasi 2'000 persunas ed ei in liug da vacanzas e da sport da renum internaziunal.

Buca mo igl unviern, mobein era la stad renda ei da visitar nies vitg; buca mo virtualmein, mobein era persunalmein. Vus vegnis a sustar da nossa biala cuntrada muntagnarda intacta, dil stupend liug da habitar e / ni dallas numerusas purschidas. Cheu sa mintgina e mintgin praticar tenor giavisch sport, cultura e divertiment.

Igl engrondiment dallas diversas infrastructuras, ina scola innovativa e la natira fascinonta cun ils lags da Laax fan ch'ins sesenta bein en nies vitg.

La cuorta presentaziun da nossa vischnaunca duei intimar Vus da vegnir ina gada e seperschuadar el liug dalla qualitad da viver aulta e dallas preferenzas da nossa vischnaunca.

Haveis Vus damondas ni propostas? Communichei Vies meini a nus per mail ni per telefon +41 81 921 51 51.

Grond engraziament per Vossa viseta egl internet e tgi sa, forsa sentupein nus prest ina gada persunalmein. Jeu havess plascher!

Cordials salids

Franz Gschwend, president communal