Romontsch

Per nus a Laax ei la bilinguitad ina caussa normala. Nies lungatg mumma ei il romontsch, pli precis il sursilvan che vegn discurrius en Surselva da 15’000 persunas. Ultra dil sursilvan vegnan aunc discurri e scret en Svizra quater auters idioms romontschs.
Dapi 1982 exista era il rumantsch grischun, in lungatg da scartira unificau, che vegn en special duvraus dalla confederaziun e dil cantun Grischun.

La scola. In garant per il futur dil romontsch a Laax ei la scola. Tenor la lescha da vischnaunca vegnan la scoletta e las empremas treis classas menadas per romontsch. Ella 4. classa vegn lu il tudestg instruius sco emprem lungatg jester.

Cuors. Sche vus passenteis in temps pli liung a Laax, ni sche vus prendeis schizun dimora en nossa vischanunca, recumandein nus la viseta d’in cuors da romontsch. Per aschidadir in «cuors gratuit» ei la commembranza en ina da nossas uniuns. Leu vegnis vus en contact cun la glieud e cul lungatg romontsch.

1991, cura che la Confederaziun svizra ha festivau igl anniversari da 700 onns, e la 3. «Scuntrada rumantscha» ei vegnida organisada a Laax, ha la vischnaunca tschentau in clar signal per mantener l’identitad romontscha. A caschun dalla radunonza da vischnaunca dils 15 da mars ei la revisiun dalla lescha da vischnaunca vegnida approbada. En quella ha Laax stipulau sco emprema vischnaunca insumma in «principi territorial», sco era ulteriurs artechels che gidan da promover il romontsch. En special ein quei

Art. 4 La vischanunca da Laax sesanfla el territori linguistic romontsch.
Art. 25 Ils protocols dalla radunonza communala, dalla suprastonza e dil cussegl da scola vegnan screts per romontsch.
Art. 56 63 L’instrucziun en scoletta sco era en scola primara tochen la tiarza classa vegn fatga exclusivamein en romontsch.

ADRESSA DA CONTACT PER INFORMAZIUNS E CUORS

Contact

Lia Rumantscha
Via da la Plessur 47
7001 Cuira
Telefon +41 81 258 32 22
Mail
alla pagina

VOCABULARIS E DICZIUNARIS ROMONTSCHS ANFLEIS VUS CHEU


DERASAZIUN DILS TSCHUN IDIOMS



© Lia Rumantscha
Situaziun da llas vischnauncas il schaner 2015