Informaziuns uffeci da baghegiar
Vischnaunca Laax –Exposiziun publica da cooperaziun Planisaziun locala – Midadas da muntadasutordinada
En applicaziun digl art. 13 dall’ordinaziun davart la planisaziun dil territori dil cantun Grischun (OPTGR) ha liug l’exposiziun publica da cooperaziun pertuccont ina revisiun parziala dalla planisaziun locala dalla vischnaunca da Laax. Cheu setracta ei da midadas da muntada sutordinadas tenor art. 48 al. 3 dalla lescha cantunala davart la planisaziun dil territori (LPT).
Object:
Revisiun parziala lingia da distanza d’uaul parc. nr. 3599
Acts d’exposiziun:
– Plan da zonas 1:500 Distanza d’uaul, parc. nr. 3599
Basa:
– Rapport da planisaziun e cooperaziun
Termin d’ exposiziun:
dils 2-10-2026 entochen ils 2-11-2026 (30 dis)
Liug / temps d’exposiziun:
Uffeci da baghegiar Laax, duront las uras d’avertura, tel. 081 921 51 53
Propostas ed objecziuns:
Duront il temps d’ exposiziun sa mintgin inoltrar alla suprastonza communala propostas ed objecziun en scret e cun motivaziun.
02.10.2026
Clom: Tagliar anavos seivs vivas e caglias!
Igl unviern vegn, e cun el il criec. Per che vias e passapeis restien segir:as e liber:as ein tuts proprietaris da terren supplicai da tagliar anavos lur seivs vivas, caglias e plontas per liung da vias.
Il suandont vala:
- 50 cm distanza: Seivs vivas, seivs da sochel e mirs ston esser silmeins 50 cm naven dil cunfin dalla via. Tier seivs vivas quenta il rom il pli dado (art. 61 lescha da baghegiar communala).
- Nuot varga en: roma e frastgas astgan buca vargar ora en via ni passapei, era buca sch’ellas sestorschan sut la grevezia da neiv.
- Tener liber l’altezia: Sur passapeis sco era vias sto ina altezia clara da silmeins 4.50 m restar libra.
Quei vala per liung da tuttas vias publicas sco era per liung da vias privatas che vegnan rumidas duront igl unviern entras la vischnaunca.
Termin: 31 d’october 2026
Ei tochen lu buca tagliau, surpren la gruppa stradala ni ina interpresa incumbensada las lavurs. Ils cuosts portan ils proprietaris.
Cordial engraziament per Vies agid, per vias segiras ed in maletg dil vitg tgirau!
30.09.2026
Via Murschetg – cuvrida da catram
L’jamna dils 5 entochen ils 9 d’october 2026 han liug sin la Via Murschetg lavurs per la montascha dalla cuvrida da catram.
L’installaziun dalla cuvrida da catram succeda la notg da mesjamna, ils 7 d’october, sin gievgia, ils 8 d’october 2026.
La Via Murschetg ei serrada per il traffic quella notg naven dallas 20.00 entochen las 05.00.
Muort il decuors da lavur necessari ein lavurs da notg e las emissiuns da canera che stattan en connex deplorablamein buca d’evitar.
Il termin ei dependents dall’aura e sa vegnir spustaus en cass da cundiziuns meteorologicas disfavoreivlas.
Nus engraziein per Vossa capientscha.
25.09.2026
Sanaziun Via Pardanal – Entschatta dallas lavurs da construcziun
Las lavurs da construcziun per la sanaziun dalla Via Pardanal entscheivan ils 29 da settember 2026 e cuozan prevedentamein entochen la fin d’october 2026.
Il tschancun pertuccau s’extenda naven dalla Via Pardanal 10 entochen tier la deponia da verdems Pardanal. Duront il temps da baghegiar vegn la via serrada pil traffic. En quei interval succedan las lavurs da sanaziun inclusiv la construcziun dallas rasadas e dalla nova cuvrida.
L’accessibladad e la carrabladad entochen tier la deponia fundamentala ei da principi garantida. Muort il progress da construcziun sa ei denton dar da temps en temps restricziuns ni cuortas interrupziuns digl access.
Nus supplichein per capientscha per las restricziuns colligiadas cun las lavurs da construcziun ed engraziein per il risguard.
25.09.2026
Habitaziun da 2½ combras per affittar
La vischnaunca affittescha naven digl 1. da december 2026:
1 habitaziun da 2½ combras, 1. plaunterren
Casa Alpina, Via Curtgin la Streia 3, 7031 Laax
Termins da visitaziun pusseivel senza annunzia tier dunna Kaulfuss:
Gievgia, 01-10-2026 dallas 13.30 – 18.30
Mardis, 06-10-2026 dallas 13.30 – 16.00
Criteri d’occupaziun: maximal 2 persunas
Termin d’annunzia: 8 d’october 2026
22.09.2026
Acziun da bandieras per la populaziun
Mussar bandiera – per Vossa vischnaunca, Vies cantun e Vossa tiara!
La vischnaunca da Laax lantschescha in’acziun da bandieras per la populaziun. Seigi quei vid il balcun, vid la fatschada ni en curtgin – cun in’atgna bandiera tschenteis Vus in segn veseivel d’attaschadadad a nossa vischnaunca, al cantun Grischun ed alla Svizra. Gest ils firaus, sco igl 1. d’uost ni tier occasiuns specialas procuran bandieras alzadas per in maletg festiv e communabel dil vitg.
Interessent:as habitonts:as san empustar naven d’immediat bandieras per cundiziuns favoreivlas. Per elecziun stattan construcziuns cusidas e stampadas sco era duas variantas dalla fixaziun. La cumbinaziun giavischada sa vegnir indicada sil talun d’empustaziun sin la pagina d’internet dalla vischnaunca.
Empustaziuns entochen:
fin october 2026, cun suandont talun d’empustaziun
https://forms.cloud.microsoft/e/fDrHZ0KwP6?embed=true
ni per telefon tier l’administraziun communala 081 921 51 51
Suenter la scadenza dall’acziun d’empustaziun vegnan entochen
dacheu neginas empustaziuns pli acceptadas.
Retratga:
naven dil december 2026
Purschida e prezis
Tenor gliesta aschuntada.
Pindel seniester: Per pétga dalla bandiera, cun carabina
Onza sura: per pender vid balcun etc.
31.08.2026
Via Principala – conducts d’ovra, etappa 9+10/2026
Naven dils 07 da settember.2026 entscheiva la proxima etappa dalla sanaziun dil conduct d’ovra alla Via Streglia e cuoza prevedentamein entochen l’entschatta december 2026.
El rom da quellas etappas vegnan ils conducts d’ovra existents renovai ed engrondi.
Duront las lavurs da construcziun ei la Via Streglia serrada pil traffic motorisau sco era per velos. Igl access a pei resta da principi garantius da tut temps.
Las serradas ed ils sviaments necessaris vegnan signalisai corrispundentamein el liug.
Nus engraziein per Vossa capientscha e per Vies risguard.
18.08.2026
Lavurs da sanaziun remplazzament lingia d’aua Via Tuleu Su
Naven dils 24 d’uost 2026 entscheivan las lavurs da construcziun pil remplazzament dalla lingia d’aua existenta ella Via Tuleu Su.
Il tschancun da baghegiar s’extenda naven dil spartavias Via Spendas entochen la Via Crestas/Via Teissa. Las lavurs da construcziun cuozan prevedentamein entochen l’entschatta october 2026.
Duront las lavurs da construcziun vegn il traffic menaus sin in vial. Ei sto denton vegnir quintau cun pli liungs temps da spetga e cun impediments da traffic.
Igl access a pei ei da principi garantius da tut temps.
Nus engraziein per Vossa capientscha e supplichein da prender risguard duront las lavurs da construcziun.