Actualitads dalla suprastonza communala

La suprastonza communala ha denter auter tractau suandonts temas e decidiu sco suonda:

Novs suprastonts naven digl 1. da fenadur 2012

La raspada ha elegiu Christian Capaul e Ralf Seelig sco successurs da Franz Gschwend e Roman Cathomas en suprastonza communala. La constituziun dalla suprastonza nova ha liug l'entschatta matg.

Vacanzas en differents uffecis publics

Deplorablamein han entgins uffecis buca saviu vegnir occupai a caschun dalla davosa radunonza communala. Aschia appellein nus a nos convischins da s'annunziar tier la canzlia entochen miez matg per saver occupar ils suandonts uffecis:

-2 substituts dalla suprastonza communala

-2 substituts dalla cumissiun da gestiun

-1 commember dil cussegl da scola

-2 substituts dil cussegl da scola

Nus sperein ed essan perschuadi che bein enqual convischin vegn a star a disposiziun per las elecziuns cumplessivas per la perioda 2012 entochen 2015 a caschun dalla proxima radunonza. Per damondas stat il president communal bugen a disposiziun.

Planisaziun locala / zona da baghegiar per indigens Cons

Deplorablamein ei la revisiun totala dalla planisaziun locala aunc buca vegnida approbada dalla regenza dil cantun Grischun. Cura che quella ei avon maun, eis ei clar sche la midada da zona dalla parcella nr. 2041 a Cons vegn acceptada. La suprastonza communala ei denton gia s'occupada cun il plan da quartier ed in reglament davart la vendita da dretgs da construcziun en la zona da baghegiar per indigens Cons.

Engrondida dalla zona cun tempo 30

Tenor pareri dil biro d'inschigniers Hartmann e Sauter, Cuera, basegna ei in'amplificaziun dalla zona cun tempo 30 per liung dalla Via principala e la Via Falera. La suprastonza sustegn quella proposta ed ha decidiu d'introducir quellas restricziuns da spertadad ton pli spert ord motivs da segirtad.

Novs magisters naven digl onn da scola 2012/13

Ei legra nus da saver communicar che dunna Monica Calonder da Duvin e signur Serafin Sgier da Sevgein ein vegni elegi sco scolasts dil scalem primar naven dil proxim onn da scola. Nus giavischein ad els bia legria e satisfacziun en nossa scola.

Structuras dil di per affons pigns

Ina gruppa da lavur ei gest vid l'elaboraziun da structuras dil di per affons pigns. La suprastonza ha priu conuschientscha dil studi da factibilitad ch'ei vegnius elaboraus en collaboraziun cun la firma KIMI Krippen AG e decida da cuntiunuar cun las sclariziuns.

Engrondida dils baghetgs da scola

La suprastonza communala ha surdau ad in biro d'architectura l'incarica da planisar en detagls l'engrondida dils baghetgs da casa da scola per saver presentar quels alla proxima radunonza communala.

Pesca el Lag Grond

Il cantun ha fixau la stagiun da pesca els lags entochen ils 15 d'october. Aschia vegnin nus era a lubir la pesca el Lag Grond per quei temps prolunghiu.

Unviern 2011/12

Sin fundament dallas mesiraziuns da nies convischin Florentin Hendry savein nus rapportar ch'ei ha dau 5.38 m neiv igl unviern vargau entochen la fin mars. Quei ei la pli gronda valur dapi igl unviern da lavinas 1998/99 e sur la media dils davos 20 onns da 3.19 m.