Actualitads dalla suprastonza communala

La suprastonza communala ha denter auter tractau suandonts temas e decidiu il sequent:

Quen annual 2009

Nies quen annual siara tier entradas da 13’512'957.11 frs. cun in gudogn brut (cash flow) da 2'322'181.02 frs. Quei resultat engraziein nus denter auter al surpli d’entradas tier las taglias ed alla buna disciplina dils cuosts.

2'201'199.61 frs. vegnan duvrai per amortisaziuns ordinarias ed extraordinarias, principalmein els secturs dallas immobilias sco era dallas vias. Era cun quellas mesiras resta in surpli d'entradas da 120'981.41 frs.

Menaschi d'unviern

L'ustria Iglu resta aviarta entochen gliendisgis Pastgas, ils 5 d'avrel 2010, ferton ch'il glatsch artificial ed il runal da skis ein ord funcziun.

Onn da scola 2010/11

Ei legra nus da saver communicar che la dunna Corina Schmed, da Sumvitg, ei vegnida elegida sco scolasta dil scalem primar naven dil proxim onn da scola. Nus giavischein ad ella bia legria e satisfacziun en nossa scola.

Praticant

La suprastonza dat la pusseivladad al giuven Gian-Carlo Albin dad Uors d'absolver il praticum cun BMS tier l'administraziun communala per il temps uost 2010 entochen matg 2011. Era ad el giavischein nus bia legria e satisfacziun tier nossa administraziun.

Fiasta federala

L'organisaziun ed il menar atras la fiasta digl emprem d'uost 2010 ei vegnida surdada alla RGAlpenarena ed all'uniun da giuventetgna da Laax. Nus sperein puspei sin in grond success dalla fiasta federala ch'ei enconuschenta sur ils cunfins da nossa vischnaunca.

Laax, ils 26-03-2010                                                         La suprastonza communala