Schriftgrösse: A A A

Encurir | Sitemap

Novitads dils pumpiers

28-08-2009 / naven dallas 18.00 inauguraziun dil niev auto d'emprem servetsch
Vus essas cordialmein envidai all'inauguraziun e silsuenter alla demonstraziun.
 
(text e fotografias suondan)
 
 
22-08-2009 / 02.57 in auto da persunas ei barschaus ora cumplettamein
En connex cun in accident persunal caschunau cun in auto da persunas ei igl auto barschaus ora cumplettamein sonda endamaun, silla via denter Laax e Schluein. Il manischunz e sia cunautista han saviu bandunar igl auto sauns e salvs.
 
Il manischunz era sin via naven da Laax encunter Schluein. Ella schi numnada storta Fletg ei il auto sdermanaus. Sco emprem ei igl auto ius vi el mir e suenter ella saiv da segirezza da vart seniastra. Immediat suenter ha il motor igl auto entschiet a barschar. Il barschament ei vegnius stizzaus dil punct da sustegn Laax/Falera.


04-08-2009 / 19.30 / Laax / exercezi d'acziun punkt da sustegn dustanza d'ieli
Il tema dil exercezi d'acziun «cumbat encunter gas e vapur» ei vegnius serraus giu cun success.
 
17-07-2009/ 21.05 / Via Pendas / malauras Laax
In ferm urezi a undau in tanc cun ca. 50 cm aua. Ils pumpiers da Laax/Falera han giu spert sut controlla la situaziun e han pumpau ora l'aua.
 

12.09.2007 / 14.26 uras / Sagogn / 1 tractor barschaus ora cumplettamein
 La mesjamna suentermiezdi ei in tractor tier in bein puril a Sagogn vegnius barschaus ora totalmein.
Malgrad ch’ils pumpiers da Sagogn e Laax han saviu stizzar il fiug spert, han il tractor giu in donn total. Negin ei vegniu blessaus.
Il vehichel steva sut il bein puril sin ina prada. Il fiug ei ruts ora egl areal dallas installaziuns electronicas. Cuort temps pli tard steva il tractor en cumplet fiug.
Il donn da material munta a rodund 70'000 francs.
Motiv da barschament ei cun gronda probabladad in defect.
 
 
16.06.2007 / ILS PUMPIERS DA LAAX sepresentan…
 E biars habitonts e hosps ein s’interessai per «il mund» dils pumpiers da Laax.
 
Schurmetg da respiraziun, survetsch da salvament, defensiun d’ieli, samariters, motorpumpa, eveniment elementar e TLF ein vegni declarai en detagl ed igl engaschi 1:1 presentai en. Suenter igl exercezi ha la bellezia aura lubiu a nus star da cumpignia cun ligiongias dil grill e bubrondas.
 
Per ils affons ei la cooperaziun tiel «sittar goals» cun attacca sperta stada il highlight.
 
All’entira cumpignia da pumpiers in cordial engraziament!


01.06.2007 accident da traffic d’in camiun cun car annex
 Venderdis suentermiezdi ei in manischunz d’auto da vitgira cun car annex vegnius blessaus miez ferm tier in accident a Fletg, sin territori communal da Laax, sin la via digl Alpsu.
El ei vegnius transportaus cun l’ambulanza el spital da Glion.
Allas 13.20 uras carrava il manischunz cul car annex cargaus cun ina valza da Laax en direcziun da Glion. En la nunsurveseivla storta dretga sut la bifurcaziun da Sagogn ei la composiziun digl auto da vitgira selischnada sin la  via bletscha. En la consequenza ei igl auto da vitgira collidaus cul mir dretg dalla via. La valza da 15 tonnas ei cupitgada dil car annex ed ei restada giu sin la via.
Dil car annex e dalla valza ein ielis da hidraulic e motor culai el foss dalla via.
La truppa da defensiun d’ieli ha priu ensemen igl ieli cun cola da ligiar. Tenor igl uffeci per natira ed ambient ein neginas ulteriuras mesiras da segirtad stadas necessarias.
Duront duas uras ha il plaz d’accident buca saviu vegnir passaus. Il traffic d’autos ei vegnius sviaus sur Sagogn e Versomi.


28-04-2007 / 15.17 barschament d’auto a Larnags
Ils pumpiers da Laax han oz stuiu serender cun 5 umens ed il TLF per stizzar in incendi d’auto sur Larnags. Malgrad igl engaschi spert dils pumpiers, ils quals ein stai sil liug enteifer 8 minutas, ei igl auto vegnius devastaus cumpleinamein dalla flommas. Igl automobilist era sin via da serender tier sia tegia cura ch’igl auto ha entschiet a barschar. Entras siu agir prudent eisi reussiu ad el dad ir anavos cugl auto per 50 meters. Aschia ha il fiug buca saviu sederasar egl uaul, il qual ei fetg secs el mument.

Adatg
prighel d’incendis digl uaul!
Egl entir cantun ei strictamein scumandau da far fiug el liber!
 

16-04-2007 / 12.45 e 16.30 Barschament da pastiras
Oz essan vegni clamai duas gadas. A Cons - en direcziun da Larnags – ha ina fueina, ch’ei per negligientscha buca vegnida stizzada dil tut, caschunau in barschament da pastiras d’ina dimensiun da 20x10 m. Entras l’intervenziun immediata dils pumpiers ha il pir saviu vegnir impedius. Per menar l’aua al TLF en quella zona malcuntonschibla havein nus stuiu derasar ils conducts d’aua per 400 m. Il secund fiug ei sederasaus a caschun da lavurs da rumida gest sut Falera. Ch’eu ei l’intervenziun stada cuorta. La collaboraziun culs pumpiers da Falera ha funcziunau fetg bein.

A quella caschun appelein nus da buca vuler far fiug el liber!

 
24.12.2006 Cars jasters, cars indigens da Laax
Il commando da pumpiers e la gruppa engrazian a Vus per Vies sustegn egl onn 2006 e giavischan in emperneivel onn 2007.
 
Risguardar ils ulteriurs reglaments per plascher:
 
candeilas, crans d’advent e pigneuls da nadal
Maina schar envidau las candeilas senza guardia, adina stizzar tuttas avon che bandunar il liug.
Usitei candaliers che san buca pagliar fiug (metall, veider…) ils quals eviteschan il dagirar da tschera.
Tener ina segira distanz da materialias inflamadas.
Procurtei per in ferm tegn dil pigniel.
Il pigniel da nadal schigienta mintga di pli fetg, il prighel da fiug vegn pli gronds.
hagies semtgau el cassa d’urgenza ina cozza da stizzar ed ina sadiala aua!
TELEFON 118
 
 
20-07-2006 PRIGHEL D’INCENDIS DIGL UAUL!
Adatg prighel d’incendis digl uaul
Considerond il grond prighel d’incendis digl uaul actual supplichein nus d’esser fetg precauts duront far fiug el liber e da buca fierer stumbels da cigarettas ardents.
 
 
06-06-2006 / 19.38 Flem: Barschament grond – 150 pumpiers en acziun
Rodund 150 pumpiers ein stai en acziun margis sera per cumbater il grond incendi a Flem. Pér entuorn las 02.00 han ils pumpiers saviu controllar igl incendi e saviu stizzar quel per gronda part. Neginas persunas ein vegnidas blessadas.
14 baghetgs, 7 casas e 7 clavaus ein vegni donnegiai cumpleinamein. Era las casas ella vischinonza ein vegnidas donnegiadas. Rodund 30 persunas han stuiu vegnir evacuadas.
 
La collaboraziun cun las truppas da pumpiers presentas da Cuera, Panaduz, Razén, Trin, Flem, Laax e Glion e las uniuns samaritanas ei gartegiada senza incaps. Als pumpiers presents ed als samaritans sco era alla vischnaunca da Flem ed alla polizia cantunala in grond DIEUS PAGHI!


13-05-2006 / Exercezi communabel barschament d’uaul (Flem, Laax, Schluein)
Text e maletgs suondan.


29-04-2006 / 20.46 Alarm fauls «Berghaus Nagens» 2127m.s.m.
Sonda cuort avon las 21.00 havein nus survegniu in alarm sil pager «alarm automatic da fiug Berghaus Nagens». Damai che la sesiun d'unviern ei alla fin ei quei baghetg el mument buca habitaus.
Ina leva cozza da nebla cuvreva la vesida sil Nagens per constatar la situaziun, aschia ch'ei ha dau nuot auter che ir si cun ina truppa da pichet (6 umens), schurmetg da flad e TLF. La via da Nagens era bein senza neiv, denton era quella ualti leischna, damai ch'ei haveva bischau il gi avon e quella sera cuflavi ualti ferm.
Suenter ina controlla intensiva havein nus saviu eruir danunder ch'igl alarm era vegnius provocaus ed aschia retrer quel allas 21.41. La collaboraziun cun la zentrala d'urgenza NEZ, Cuera, per sclariments ed ulteriuras informaziuns, ha funcziunau excellentamein. Bien engraziament.


25-02-2006 / 04.55 Agid al vischinadi (Mungga Stuba, Flem)
La sonda-endamaun cuort avon las 05.00 ha in’emploiada dil hotel alarmau la polizia cantunala, che la Mungga Stuba, in’ustria a Flem Casa d’Uaul, brischi. Ei setracta d’in restaurant en fuorma d’in chalet. Per cumbater il fiug ein ils pumpiers locals da Flem sco era ils pumpiers da Laax e Trin stai en acziun. Neginas persunas ein vegnidas blessadas. Malgrad igl engaschi nunstunclenteivel dils pumpiers ei igl entir edifeci barschaus giu tochen sils mirs. Ils donns muntan a plirs tschiens mellis francs. La raschun dil barschament ei motiv d’ina inquisiziun, la quala ei vegnida iniziada immediat.


04-02-2006 / 23.46 Barschament d’auto ella «Via Darschalè»
Entuorn mesanotg essan nus vegni alarmai pervia d’in barschament d’auto ella 'Via Darschalè'. Igl auto barschava gia cumpleinamein. Il fiug ei staus en cuort sut controlla ed ha saviu vegnir stizaus. La raschun dil barschament ei buc enconuschenta.


27-12-2005 Igl onn 2005 va prest a fin
En num dall’entira squadra dils pumpiers da Laax giavischein nus als habitonts ed a nos hosps tut il bien per igl onn 2006 ed a quella caschun engraziein nus per l’emperneivla collaboraziun duront igl onn che va prest a fin.

Il commando da pumpers Sch’ei brischa telefonar al 118


26-08-2005 Malauras en Svizra
Era Laax ei buca vegnius schanegiaus dallas malauras. Las draccadas han donnegiau ina part dalla via d’alp Nagens, aschia che quella ha stuiu vegnir bloccada per entgins gis. Il lag artificial da Murschetg ei vegnius invasaus da plirs 100 m3 buglia e crappa. Sco instruider haiel jeu prestau survetsch a Claustra, nua che las malauras han caschunau ils pli gronds donns el cantun Grischun. Biars habitonts eran barricai en lur casas ed han saviu vegnir purtai en segirtad mo cul helicopter dalla REGA.


11.-08 – 13-08-2005 Fat Tire
Mintg’onn ha liug l’occurrenza internaziunala dils motociclists sil Alp Plaun. Ils pumpiers s’engaschan adina tier quella caschun per garantir la segirtad da quels hosps en cass da necessitad. Aschia vegn eregiu in puoz per stizzar in eventual fiug (cuntegn 3’000 l aua), dal qual era il helicopter savess far diever. La pumpa da motor tip I affluescha aua dal dutg barricau.


29-07-2005 / 17.31 Differentas intervenziuns suenter suffels
Il vendergis entuorn las 17.30 han ferms suffels passau Sagogn e Laax, ils quals han sragischau differents pegns ch’ein sederschs sin la via Cantunala el contuorn dalla Casa Caltgera ed han interrut la via da colligiaziun a Salums. Allas 21.00 eran tuttas lavurs da rumir terminadas entras igl engaschi speditiv dils pumpiers che han luvrau cun 6 umens.


19-07-2005 / 22.43 Agid al vischinadi
Falera: Donns per milliuns tier in barschament en ina scrinaria Il margis-sera tard ha in barschament devastau ina scrinaria amiez il vitg da Falera e caschunau donns per milliuns francs. Neginas persunas ein vegnidas blessadas. Il proprietari ha scuviert il fiug ed ha dau alarm allas 22.41. Il fiug ei seformaus ella scaffa da distribuziun, la quala ei localisada en ina preit intermediaria dil luvratori el plaun sut. Las flommas ein bein spert sederasadas sil deposit da lenna ch’ei localisaus gest sur la scrinaria e naven da leu sin la casa annexa. Tuts ils habitonts han saviu bandunar igl edifeci ad uras. Per cumbatter il barschament ein 25 pumpiers da Falera, 14 pumpiers da Laax cugl auto-cisterna sco era 10 pumpiers da Flem dil schurmetg da flad s’engaschai.


18-07-2005 / 16.39 Barschament d’in camiun sin l’altezia dil Seehof
Entras igl engaschi spert dalla gruppa dil TLF cun 3 umens ha il fiug saviu vegnir stez immediat. La via cantunala ei vegnida aviarta suenter mo 10 minutas da barricada. Allas 17.45 era la via puspei carrabla ed il camiun era deponaus. 22-06-2005 / 19.30 Exercezi cul TLF ed in niev sistem da fermada. Quella sera ei il sistem da fermar aua, mess a disposiziun dalla firma alba, tecnica da pumpiers da Weesen, entraus en funcziun. Il dutg sa vegnir fermaus senza gronda manipulaziun e fuorma aschia in pign lag, dal qual ins sa pumpar l’aua cun la pumpa da motor tip II. Igl exercezi prevedeva il transport d’aua tochen tier la Tegia Larnags, nua che nus havein furmau 2 scuts d’aua per proteger la staziun intermediara dallas gondolas da 12. In grond engraziament alla firma alba-tecnica da pumpiers, signur Alois Bamert.


22-06-2005 / 19.30 Exercezi cul TLF ed in niev sistem da fermada.
Quella sera ei il sistem da fermar aua, mess a disposiziun dalla firma alba, tecnica da pumpiers da Weesen, entraus en funcziun. Il dutg sa vegnir fermaus senza gronda manipulaziun e fuorma aschia in pign lag, dal qual ins sa pumpar l'aua cun la pumpa da motor tip II. Igl exercezi prevedeva il transport d'aua tochen tier la tegia Larnags, nua che nus havein furmau 2 scuts d'aua per proteger la staziun intermediara dallas gondolas da 12.


Anavos tils pumpiers

Uras
d'avertura canzlia

Gliendisgis - Vendergis
09.30 tochen 11.30
15.00 tochen 17.00

Telefon:
081 921 51 51

E-Mail:
admin@laax-gr.ch


Adressa:
Center Communal
caum postal 16
7031 Laax

Plan da la situaziun
Plan dal vitg